Sistema kapitalista eremu publiko eta pribatuen banaketan oinarritzen da. Horrek esan nahi du langileok behartuta gaudela enplegua bizitzaren beste edozein alderdiren aurretik jartzera, gure eguneroko zereginak planifikatuz eta egituratuz ideia honen arabera: zainketa-lanek (eremu pribatuari atxikiak) ezin dutela lan-eremua inbaditu. Kasu askotan, lehenespen hori egin behar izateak behartzen gaitu kontratu-lanaldia gainditzen duen eskuragarritasuna izatera.

2019an, Farapi Kooperatibatik erabaki genuen gure lan egiteko modua eraldatu nahi genuela, gure ideologiarekin bat zetorren egitura bat sortuz: gerentzia zuen kooperatiba izatetik hierarkizatu gabeko kooperatiba izatera igaro ginen, lantaldeetan antolatuz. Orduz geroztik, eredu bizigarri baten alde ari gara lanean, pertsonen eta taldearen ongizatea erdigunean jartzeko, proiektuaren bideragarritasuna eta gure ingurunean sortzen duen eragina kontuan hartuta.

Ekonomia feministak eskaintzen duen markoa funtsezkoa izan da lan-eredu berri hori bultzatzeko. Hori praktikan jartzeko eta gure errealitatean aplikatzeko, gure lana egituratzen duten hainbat dimentsio adostu ditugu. Halaber, dimentsio horiek praktikan jartzen lagunduko diguten prozesuak eta tresnak sortu ditugu.

Prozesuaren berri izan nahi baduzu: ​ESKURATU VIII. EKONOMIA FEMINISTAKO KONGRESURAKO POSTERRA (2023KO MARTXOA)